Bakgrunnur

Skólaráð Brunamálaskólans ákvað að efla hlut fjarkennslu í námskeiðum skólans þó sérstaklega í grunnnámi hlutastarfandi slökkviliðsmanna en slíkt námskeið hefst 1. febrúar næstkomandi.

Áætlun fyrir allt árið 2011 er hér lögð fram fyrir námskeið 3 og 4 ásamt öðrum námskeiðum hjá Brunamálaskólanum.

Athugið að skráning á námskeið (önnur en námskeið 1, 2 f.hl. og 2 s.hl.) þarf að berast Brunamálaskólanum að minnsta kosti 10 dögum áður en það hefst. Lágmarksfjöldi þátttakenda er almennt 12 og hámarksfjöldi 24 nema annað sé tekið fram, náist ekki lágmarksfjöldi á námskeiðið fellur það niður. Skráning er jafnframt staðfesting slökkviliðsstjóra á að viðkomandi slökkviliðsmenn hafi lokið fornámi og námi sem samsvarar undanfarandi námskeiðum og hafi aukin ökuréttindi þar sem það á við.

Á undanförnum árum hafa fallið niður þó nokkur námskeið hjá Brunamálaskólanum fyrir hlutastarfandi slökkviliðsmenn vegna þátttökuleysis. Það er því mjög nauðsynlegt að námskeiðin séu haldin fyrir öll lið í landsfjórðungunum þar sem fleiri lið sameinist um að senda menn á námskeið.

Þátttakendur í námskeiðum á vegum Mannvirkjastofnunar þar sem farið er í reykköfun skulu slysatryggðir af vinnuveitanda, hafa til umráða hlífðarfatnað til reykköfunar af viðurkenndri gerð og leggja fram læknisvottorð um heilbrigði sitt og færni.

Námskeið 3 og 4 í grunnnámi hlutastarfandi slökkviliðsmanna hefjast kl. 13:00 á föstudegi og lýkur fyrir kl. 18:00 á sunnudegi.

Grunnnám hlutastarfandi slökkviliðsmanna, námskeið 3 og 4:

Verkleg kennsla og próf fyrir hlutastarfandi slökkviliðsmenn vegna námskeiða 1., 2.f.hl. og 2.s.hl.

Haustönn 2011. Dagsetningar verða ákveðnar síðar miðað við þann fjölda sem hefur lokið bóklega hluta námskeiða og aflað sér nægrar verklegrar kunnáttu á æfingum hjá slökkviliðum sem slökkviliðsstjóri staðfestir. Einungis er hægt að bjóða upp á verklegpróf þar sem yfirtendrunargámur er staðsettur.

Nám atvinnuslökkviliðsmanna:

Haldið verður eitt námskeið fyrir atvinnumenn á árinu. Þar er um að ræða seinni hluta atvinnumannanámskeiðsins. Námskeiðið verður í umsjá Slökkviliðs höfuðborgarsvæðisins. Tilkynningar um þátttöku skulu berast til „birgir.finnsson@shs.is“.

Nákvæmar dagsetningar verða ákveðnar í samráði við hlutaðeigandi slökkvilið.

Nám eldvarnaeftirlitsmanna:

Haldið verður námskeið I og  II fyrir eldvarnaeftirlitsmenn sem er grunnnám fyrir eldvarnaeftirlitsmenn þannig að þeir geti unnið við almennt eldvarnareftirlit og farið yfir teikningar.

Lágmarksfjöldi þátttakenda á eldvarnaeftirlitsnámskeiðum er 10 og hámarksfjöldi 16 (20 á námsk. 1). Lámarksfjöldi á endurmenntunarnámskeið fyrir eldvarnaeftirlitsmenn er 4 og hámark 8. Náist ekki lágmarksfjöldi á námskeiðið fellur það niður. Dagsetning námskeiðsins á Akureyri verður ákveðin síðar.

Nám stjórnenda í slökkviliðum:

Á árinu 2007 voru sveitarfélögum afhentir gámar til að æfa heita reykköfun, slökkviliðin þurfa að hafa þjálfunarstjóra sem eru ábyrgir fyrir æfingum og rekstri þessara gáma. Haldin verða allt að sex námskeið fyrir þá þjálfunarstjóra (yfirterndrunarnámskeið). Hægt er að hnika til dagsetningum ef þess er óskað. Mikilvægt er að slökkviliðsstjórar sendi menn á þetta námskeið vegna aukinnar verklegrar kennslu sem þeir þurfa að framkvæma vegna námskeiðs 1, 2 f.hl. og 2 shl.

Eitt námskeið fyrir stjórnendur hlutastarfandi liðs verður á árinu. Mögulegt er, miðað við þátttöku að, staðsetning þess verði færð til.

Eitt námskeið verður haldið fyrir slökkviliðsstjóra hlutastarfandi liðs.

Lágmarksfjöldi þátttakenda á þjálfunarstjóranámskeiði er 8 og hámarksfjöldi 12. Lágmarksfjöldi þátttakenda á slökkviliðsstjóranámskeiði er 10 og hámarksfjöldi 16. Náist ekki lágmarksfjöldi á námskeið fellur það niður.

Námskeið fyrir þjónustuaðila handslökkvitækja:

Haldið verður námskeið fyrir þjónustuaðila handslökkvitækja vorið 2011, dagsetning auglýst síðar. Lágmarksfjöldi á námskeiði er 8 manns og hámarksfjöldi 16 manns. Náist ekki lágmarksfjöldi á námskeið fellur það niður.